अष्टापूर: अष्टापूर (ता. हवेली)आचार्य अत्रे विकास प्रतिष्ठान, पुरंदर संचलित न्यू इंग्लिश स्कूल, अष्टापूर येथे विद्यालयातील माजी विद्यार्थी सोनुल अण्णासाहेब कोतवाल आणि विकास विठ्ठल भोसले यांचा सत्कार समारंभ उत्साहात पार पडला.
महाराष्ट्र राज्य सेवा परीक्षेतून क्लास-वन अधिकारी म्हणून सोनुल कोतवाल यांची, तसेच मुंबई पोलीस दलात पोलीस शिपाई म्हणून विकास भोसले यांची निवड झाल्याबद्दल शाळा समिती व गावातील मान्यवरांच्या हस्ते पुष्पगुच्छ व श्रीफळ देऊन त्यांचा सन्मान करण्यात आला.
सत्काराला उत्तर देताना सोनुल कोतवाल म्हणाले की, शाळा केवळ शिक्षणाचे केंद्र नसून विद्यार्थ्यांच्या जीवनाला दिशा देणारे प्रेरणास्थान आहे. कठोर परिश्रम, जिद्द आणि चिकाटी यांच्या जोरावर कोणतेही यश मिळवता येते. तसेच मोबाईल, व्हॉट्सअप, फेसबुक, इन्स्टाग्राम यांसारख्या अभ्यासात अडथळा आणणाऱ्या गोष्टींपासून दूर राहण्याचा सल्ला त्यांनी विद्यार्थ्यांना दिला.
शाळा समितीचे अध्यक्ष श्रीहरी कोतवाल म्हणाले की, शाळेत शिकणारे विद्यार्थी फुले आहेत, तर यशस्वी झालेले माजी विद्यार्थी ही त्या वृक्षाला लागलेली गोड फळे आहेत. त्यांच्या यशामुळे शाळा आणि गावाचा अभिमान वाढतो. समिती सदस्य विजय कोतवाल आणि नितीनशेठ मेमाणे यांनीही दोन्ही विद्यार्थ्यांच्या संघर्षमय प्रवासाबद्दल गौरवोद्गार काढले व उज्ज्वल भवितव्यास शुभेच्छा दिल्या.
कार्यक्रमास यशवंत सहकारी साखर कारखान्याचे संचालक शामराव कोतवाल, प्रतिष्ठानचे नियामक मंडळ सदस्य रमेश कोतवाल, माजी सरपंच दत्तात्रय कटके, अश्विनी कोतवाल, भैरवनाथ प्रासादिक दिंडीचे माजी अध्यक्ष शामराव वारे, पोलीस पाटील कैलास कोतवाल, विठ्ठल भोसले यांच्यासह अनेक मान्यवर उपस्थित होते.
कार्यक्रमाचे प्रास्ताविक मुख्याध्यापक सुभाष काळे यांनी केले. सूत्रसंचालन सहशिक्षिका सुशीला सातपुते यांनी तर आभारप्रदर्शन सहशिक्षक नवनाथ भागवत यांनी केले.
उपस्थित शिक्षक, शिक्षकेतर कर्मचारी, विद्यार्थी, पालक व ग्रामस्थांनी दोन्ही यशस्वी विद्यार्थ्यांचे मनःपूर्वक अभिनंदन करून त्यांच्या उज्ज्वल भवितव्यास शुभेच्छा दिल्या.
