नवी दिल्ली – जगभरात कॅन्सर रुग्णसंख्या झपाट्याने वाढत आहे. मात्र योग्य आहार आणि जीवनशैलीतील काही सकारात्मक बदल करून आपण कॅन्सरचा धोका लक्षणीयरीत्या कमी करू शकतो, असं ३० वर्षांपासून संशोधन करणाऱ्या अमेरिकन बायोकेमिस्ट डॉ. थॉमस सायफ्रिड यांनी स्पष्ट केलं आहे.
त्यांच्या अभ्यासानुसार कॅन्सर टाळण्यासाठी आणि शरीराची नैसर्गिक रोगप्रतिकारक शक्ती वाढवण्यासाठी खालील ६ उपाय अत्यंत प्रभावी ठरतात:
१. रक्तातील साखर नियंत्रणात ठेवा
कॅन्सर पेशी वाढण्यासाठी ग्लुकोजवर अवलंबून असतात. त्यामुळे साखरेचे प्रमाण कमी ठेवणे म्हणजे त्या पेशींना “ऊर्जा” न देण्यासारखे आहे.
२. केटोजेनिक आहाराचा अवलंब करा
हा आहार ग्लुकोजऐवजी केटोनवर आधारित असतो. केटोनचा वापर सामान्य पेशींना शक्य असतो, पण कॅन्सर पेशींसाठी तो अडचणीचा असतो.
३. इंटरमिटेंट फास्टिंग (उपवासाचा नियमित पॅटर्न)
उपवासामुळे शरीरातील इन्सुलिन पातळी खाली जाते, माइटोकॉन्ड्रियल आरोग्य सुधारते आणि शरीर स्वयंशुद्धी प्रक्रियेला चालना देते.
४. नियमित व्यायाम करा
दररोजचा व्यायाम हा केवळ फिटनेससाठी नाही, तर कॅन्सरपासून बचावासाठीही अत्यंत आवश्यक आहे. तो पेशींमध्ये ऑक्सिजनची पातळी वाढवतो व सूज कमी करतो.
५. मानसिक तणाव कमी करा
तणावाचा थेट परिणाम शरीराच्या प्रतिकारशक्तीवर होतो. ध्यान, योगा, श्वसन तंत्र किंवा छंद यांद्वारे तणाव कमी करणे गरजेचे आहे.
६. अँटी-इन्फ्लेमेटरी (सूज कमी करणारे) अन्न खा
हळद, लसूण, पालेभाज्या, बेरी फळं, अँटीऑक्सिडंट्स आणि ओमेगा-३ फॅटी अ‍ॅसिडयुक्त पदार्थ यांचा आहारात समावेश करा. हे कॅन्सर विरोधात मदत करू शकतात.
